روبوتان المصري

إتحادنا مش إتحادهم

بسم الله الرحمن الرحيم

كل عام وأنتم جميعا بخيروعيد سعيد عليكم جميعا

من المعروف إن الجامعات بتحاول بكل الطرق تبعد أى شكل من أشكال الممارسة السياسية عن الحياة الطلابية بداخلهاوبتكون أوضح هذه الصور فى إنتخابات الإتحادات الطلابية واللى بتتعمل فى توقيتات غريبة و غالبا ما تكون فجأة وعلى حين غرة وبيكون الهدف من ده أولا منع الطلاب الغير مرضى عنهم " أمنيا طبعا " من إنهم يخوضوا الإنتخابات أو يدخلوا إتحاد الطلاب أو لمنع الطلاب اللى ليهم أفكار سياسية و إنتمائات غالبا ما بتكون غير مححبة لصناع القرار من التواجد فى اماكن التأثيرطبعا مفيش حد يقدر يدعى إن الإتحادات الطلابية الأن لها التأثير المرجو منها على الصعيد العام لكن تأثيرها داخل الكليات أحيانا بيكون ملموس وطبعا بعد اللائحة الجديدة إحتمال إننا مانشوفشى التأثير المحدود ده عموما على نفس هذا المنوال ونفس هذا النهج تم تحديد ميعاد إنتخابات إتحادات الطلاب بيوم الثلاثاء بعد إجازة العيد مباشرة وده هيكون يوم إستلام طلبات الترشيح وسيتم غلق باب الترشيح فى نفس اليوم وكالعادة من الساعة عشرة صباحا حتى الساعة إتنين ظهرا بس

لو حد من حضراتكوا وصل لمكتب رعاية الشباب اللى بتنسحب منه إستمارات الترشيح وبتسلم إليه الطلبات هيجد أحد أفراض أمن الكلية أو الجامعة قاعد بحجة حفظ الأمنوبمجرد غلق باب الترشيح إحتمال كبير تلاقى الظابط المسئول داخل حجرة رعاية الشباب وقافل الباب وراه ده أهم أسلوب بيتم إتباعه لإستبعاد طلاب الإخوان وطلاب الحركات الشيوعية واليساريةالأسلوب الأمنى "تدخل مباشرة " وده معروف وعلنى

فى بقى أسلوب تانى بيتم إتبعه مع الطلاب اللى فى شك من ناحيتهم أو مش مضمونين وده بإستخدام ما يسمى بكشوف الممارسةودى كشوف بيتسجل فيها أسماء كل الطلاب اللى بيمارسوا نشاط فى الكلية فى الفرق القديمة وهما دول اللى بيسمح لهم بالترشيح فى الإنتخابات تبعا لقواعد اللائحة الطلابيةالكشوف بيبقى فيها الأسماء اللى فعلا بتمارس نشاط لأنها بتتكتب قبل نهاية العام الدراسى وبيراجعها رئيس الإتحاد واللى بيتأكد من أن كل الأسماء دى فعلا مارست نشاط وكل اللى مارس مكتوب فعلا لكن مع بداية الإنتخابات ممكن يقولوا إن فلان مش موجود فى الكشوف و مش من حقه الترشيح وطبعا فى الفترة الزمنية دى لا يكون من حق رئيس الإتحاد القديم إنه يطلع ويعارض لأنه بيبقى يا إما إتخرج من الكلية أو مرشح فى الإنتخابات الجديدةوبكده بيتم إستبعاد الطلاب اللى مش مضمونين أو اللى فى خوف إنهم يقلبوا ويتحولوا لأى مسار مختلف

طبعا فى كمان أسلوب مش واضح قوى دلوقتى ومش مباشر لإستبعاد الغلابة ولاد الغلابة الفقرا من الإتحادات الطلابيةوده بيكون عن طريق شرط إن الطالب اللى مرشح نفسه فى الإنتخابات يكون مسدد للمصاريف الدراسية عن الفرقة التى بها

طبعا ممكن نقول إن ده واجب علينا ماشىلكن لما تكون المصاريف وصلت لأكتر من مية وخمسين جنيه وده ممكن يكون مرتب موظف حكومى فى شهريعنى اللى فى الإتحاد أصبح الطالب اللى مشاكل المصاريف وأسعار الكتب مش شاغله دماغه لأ ده كمان ممكن يكون من اللى بيهاجموا مجانية التعليم وبيطالب بإلغائها كمان

يعنى الوضع محاصر

رغم كده أحيانا بعض الطلاب اللى بيقدروا يثبتوا نفسهم بين زملائهم وبين قيادات الكلية المعتدلة الفكر بيقدروا يوصلوا لأمانة الإتحادات الطلابية ويقدموا لزملائهم بعض حقوقهم ولو كانت قليلة فى معظم الأحيان

أعتقد إن واجب على كل طالب جامعى إنه يحارب علشان يدخل إتحاد الطلاب ويحاول قدر المستطاع إنه يغير من فكر زملائه لجعهلم فعالين أكتر ومهتمين أكتر بحقوقهم مهما كان التمن

الموضوع صعب مش سهل ومحتاج شغل سنين وسنين من غير إنتظار مردود سريع فى الوقت الراهن

posted by Robotan @ 10:16 AM