روبوتان المصري

ومسكنا ورق واقلام ... ورسمنا شوية أحلام

معارك على كل الجبهات علشان نقدر نثبت أنفسنا ونوصل للناس ولو شئ قليل من حقوقهم

ونجحنا في كل ده وخلينا الناس كلها بتقول : أه إحنا شايفينكوا وسامعينكوا وبنتكلم عن اللى إنتوا عملتوه ومستين منكم كمان وكمان وعرفنا إنتوا تقدروا تعملوا إيه

مأقدرش انكر كم الصراعات الكبير اللى مرينا بيها وأهمها على الإطلاق هو لإثبات شرعيتنا قدام زمايلنا الطلاب اللى معتبرين إننا متعينين من الحكومة علشان ننفذ سياسات اللى اكبر مننا مش علشان إحنا إتحاد الطلاب اللى لازم يمثلهم ويجيب ليهم حقوقهم وإننا منتخبين من بينهم علشانهم

فى مقولة بتقول ما معناه إنك مادام فى إنتقادات بتوجه إليك يبقى إنته شغال والناس شايفاك ولو محدش إهتم بيك يبقى فى حاجة غلط فى شغلك إن كان ليك شغل أساسا

ولأنه لأول سنة يكون فى إنتقادات علنية لإتحاد الطلاب فى الكلية " ودى السنة التالتة ليه فيه "وإقتراحات من ناس لأول مرة تحاول تشارك معانا فى الأنشطة

علشان كده أنا حاسس بالنجاح

وأكتر حاجة أنا سعيد بيها إن كل اللى قدم حاجة للكلية تحت مظلة الإتحاد تم تكريمه وشفت فى عينيه نظرة الناجح

مش ممكن أنسى وأنا واقف على المنصة وزملائى أبطال الكلية كلهم طالعين واحد واحد علشان عميد الكلية يكرمهم في فى عيونهم سعادة عجيبة ونشوة غريبة

معانى كبيرة مش ممكن أوصفها بالكلام

لكن أكتر حاجة أسعدتنى إن رغم الصراعات الكتير اللى كانت داخل الإتحاد وبين أعضائه اللى وصلت فى بعض الأحيان لحد الشكاوى المتبادلة إلا إننا قدرنا نحتويهم جميعا وفى اليوم ده كلنا كنا واقفين وبنشارك الكل فرحتهم بنجاحهم ونجاحنا

ويمكن يكون شئ يحسب لينا إنه لأول مرة فى كليتنا ينظم إتحاد الطلاب دورات برمجة مجانية للطلاب ويكون اللى بيحاضر فيها طلاب من أبناء الكلية أكبرهم لسه فى الفرقة التالتة ويحققوا نجاح يخلى الناس تستنى إننا نبدأ دورة جديدة ويسجلوا من النهاردة إنهم لازم يكون ليهم مكان فى دورات السنة اللى جاية

وعلى الصعيد الشخصى وشئ يمكن مش كل الناس تهتم بيه لكن أنا حاسس معناه إننا قدرنا نثبت إننا إتحاد حر

إتحاد رسمى حر ورسمى ومش موازي

وقادر على العطاء بالشكل الأمثل والأفضل وبحرية سواء فى مجالات الأنشطة المختلفة أو فى المجال العلمى والدراسي

ودى صفحة جميلة بنطويها من حياتنا ................ وحلم جميل رغم صعوبته رسمناه

posted by Robotan @ 12:26 PM